ალბათ შეგინიშნავთ, როგორი რთულია უთხრა ადამიანს უარი თხოვნაზე, მაშინაც კი თუ მისი სიტუაცია გძაბავს. ბევრი ჩვენთაგანი ასეთ დროს უარს არ ამბობს არა იმიტომ, რომ მისი შესრულება შეუძლია ან ეხალისება, არამედ ცდილობს მოსალოდნელ კონფლიქტს აარიდოს თავი, ან არდახმარების შემთხვევაში, არ უნდა ადამიანის წინაშე თავი დამნაშავედ იგრძნოს, და ეს მაშინაც კი თუკი ამ თხოვნის შესრულება თავის პირად სიტუაციას გაურთულებს. მაგრამ გიფიქრიათ იმაზე, რომ ეს ყველაფერი განგრევთ?

რა არის საზღვრები და რისთვისაა საერთოდ საჭირო?

საზღვარები _ ეს უხილავი ხაზებია, რომელიც თქვენსა და სხვა ხალხს შორის არსებობს. სულიერი სიმშვიდისა და ჰარმონიული ურთიერთობებისთვის მისი დაცვა აუცილებელია. და სწორედ პირადი სივრცის დაცვას ეკუთვნის ჩვენი დღევანდელი განხილვის საკითხიც, შეგვეძლოს საჭირო დროს უარის თქმა.

პირველ რიგში უნდა გაათვითცნობიეროთ, რომ „არა“_ ეს განაჩენი არაა, ეს თქვენი უფლებაა. არ ხართ ვალდებული აუხსნათ ადამიანებს ყველა გადაწყვეტილება, თუმცა რბილმა და ტაქტიანად ნათქვამმა უარმა შესაძლოა სიტუაცია შეარბილოს. მაგალითად, ნაცვლად ფრაზისა _“არა, მე არ ვიზამ ამას“, სცადეთ და უთხარით, _ „მადლობა შემოთავაზებისთვის, მაგრამ ახლა მე არ შემიძლია მისი გაკეთება“. ვფიქრობ მეთანხმებით განსხვავებაში.

მე მესმის, როცა არ შეგიძლია უარის თქმა, ასე ერთი ხელის მოსმით რთულია ამის გაკეთება და ამ ჩვევის ცხოვრებაში დანერგვა. ამიტომ დაიწყეთ პატარ-პატარა ნაბიჯებით თქვენი პირადი საზღვრების დაცვა. სანამ კონკრეტულ რჩევებზე გადავალ მინდა შეგახსენოთ, რომ ჩვენს ცხოვრებაში ყველაზე ჯადოსნური სიტყვა, სწორედ „არა“ არის. დროულად და მტკიცედ ნათქვამი „არა“ თავიდან აგაცილებთ არაერთ სერიოზულ პრობლემას.

როგორ ვისწავლოთ უარის თქმა

• განსაზღვრეთ თქვენი ლიმიტები: რას აღარ მოითმენთ მეტად? _ეს შესაძლოა იყოს ზედმეტი თხოვნები ან შემოჭრა პირად სივრცესა თუ დროში.
• დაიწყეთ მცირედით. სცადეთ უარის თქმა ჯერ წვრილმანებში, მაგალითად, უარი თქვით შეხვედრაზე, რომელიც არ გაინტერესებთ.
• იყავით თანმიმდევრული. თუკი გაუსვით საზღვრის ხაზი ვინმესთან ურთიერთობაში, მაშინ შეინარჩუნეთ კიდეც ის. ხალხი პატივს სცემს თავისი ნათქვამი სიტყვის  შემსრულებელ ადამიანს.
• კონფლიქტის გამოწვევის რისკი რომ შეამციროთ, უარის თქმის დროს ისაუბრეთ თქვენს თავსა და ემოციებზე. ეს კარგად ამართლებს. მაგალითად, თქვით _“ მე დრო მჭირდება ჩემი თავისთვის“, ნაცვლად იმისა, რომ ადამიანს პირდაპირ მიახალოთ, _ „შენ ძალიან ბევრი გინდა“, „შენ ძალიან ბევრს ხომ არ ითხოვ’“ და ა.შ. ან უთხარით, _ „მე გაფასებ, მაგრამ ახლა ჯერ ჩემ თავს უნდა მივხედო“.

  ---

  

  ---

  როგორ შეინარჩუნოთ ბალანსი და არ დაკარგოთ ახლობელი ადამიანები

უარის სწავლის დროს თქვენ ალბათ ფიქრობთ, მე კი ვეტყვი, მაგრამ ეს ახლობელი ადამიანი რომ გამინაწყენდეს? და მართალიც იქნებით. სწორედ ამიტომ, უნდა გახსოვდეთ, მნიშვნელოვანია ოქროს შუალედის დაცვა და რომ ურთიერთობებში ჰარმონიას საკუთარი განზრახვების ახსნა ქმნის. აუცილებლად აუხსენით თქვენთვის ძვირფას ადამიანს, რომ მასთან ერთად დროის გატარება ძალიან გიყვართ, მაგრამ ხანდახან მარტო დარჩენა გჭირდებათ. ეს აჩვენებს, რომ თქვენ ამ ურთიერთობას აფასებთ, მაგრამ არც ის მიგაჩნიათ სწორად, რომ ამ ურთიერთობას საკუთარი თავი და პიროვნება შეწიროთ. სწორად დაცულმა საზღვრებმა ურთიერთობა უფრო უნდა გაამყაროს და არა დაანგრიოს.

ჟურნალისტი და ნლპ ქოუჩი ფიქრია ჭალიძე

ფიქრია ჭალიძის სხვა მასალები:

  როგორ უნდა გაიგო, რაში გაქვს წარმატების ყველაზე მეტი შანსი?

    მხოლოდ სიყვარული არასოდესაა საკმარისი

  ნინიკო გომარელი: „არ არსებობს სპორტსმენისთვის მარტივი გზა“